Nanghinaot mi nga naa mo sa maayong panglawas, pagkabasa ninyo niining atong bag-ong kalingawan unya gawas sa mga video nga malingaw kaayo tag tan-aw kay kasagaran mga kataw-anan man ang among i-post sa atong fan page. Gawas sa mga pakatawa nga mga video, nahuna-hunaan sad namo nga mas nindot kon naa pud tay source sa mga balita nga website ug maingon man usab, naa tay site nga maduolan panahon sa mga emerhensya.
Sugod karon, kini atong website makabasa mo dinhi ug mga bag-ong balita bahin sa atong nasod, mga trending balita sa tibook kalibutan, mga giya kon unsaon makahiram ug kwarta sa atong silingan...hahaha bitaw mangita mig mga source of income nga mahimong makatabang kanatong tanan nga dili lang magsalig sa usa lang ka income.
Kung sa una pwede ra nga ang bana lay mangita ug kwarta, karong panahona dili na gyod na magsilbi. Nagkataas ang atong mga palaliton, nagkadako ang atong pamilya, syempre nagkadako pud ang gikinahanglan nga kantidad para sa atong pamilya maong dinhi tudloan mo namo unsaon pagpang diskarte nga maka-kwarta ta. Karon panahona, daghan na kayong pwede pamaagi nga maka-income ta gamit ang internet. Maong matabangan mo namo nianang bahina.
Niuso napud ang LENDING karong panahona kaso lang kasagaran sa mga lending nga pwede natong maduolan gamit ang internet, ang naa sa likod nila mga intsik nga grabe magpatubo sa ilahang kwarta. Giyahan mo namo unsaon makakita ug mga lending nga pwede ninyo duolan sa panahon sa emerhensya nga gamay ra ug interest.
Kasagaran sa mabatunan ng mga website karon sa internet, puros English ug Tagalog, nganong dili man ta magbuhat ug kaugalingon natong pinulungan? Kon nahimo gani natong mga website nga English ug Tagalog nga mga Bisdak man ta, mas nindot jud kon atoang kaugalingong pinulungan ang atong buhaton.
Kini nga website - ang BISAYA ESPESYAL himoon nato ning bag-ong tambayanan para sa mga balita bahin sa panalapi, mga kataw-anan, mga giya sa bisan unsang butang ug uban pa. Kon mahimo, among likayan ang paghatag ug balita bahin sa politika nga dunay gidapigan. Paningkamotan nato nga mahimong neutral kon politika na gani ang atong hisgotan.
Gidasig mo namong tanan nga bisitahon ning atong bag-ong website para daghan sad mong mahibal-an dili lang sa mga pamatigayon ug panalapi ug uban pa. Apil nasad sa among tumong nga mapraktis mog estorya ug bisaya nga dili nato malimtan ang atong pinulungan bisan asa ta moadto. Kabalo mi nga proud mong modala sa inyong pinulungan maski asa, kay maski gani ako sauna tong OFW pako, unya puro English ug Tagalog akong mga kauban, mangita gyod kog tawo nga maka-estorya nakog binisaya para mapagawas nako ang akong gibati. Hahaha Lalom sa akong binisaya mga bai.
Kon si CALOY (Bisayang Hilaw) ug ang uban pang mga taga gawas naningkamot nga magbinisaya, unsa pa kaha ta nga gipakatawong Bisaya. Usa ni ka paagi nga dili nato malimtan ang mga laglom nga mga pulong sa Cebuano nga pinulungan o BINISAYA.
Kadaghanan sa mga Pinoy karon makabalo mo estorya ug binisaya gawas lang sa mga taga Luzon pero sa Metro Manila, perti nasad daghanang bisaya. Maong daghan ang makasabot na sa atong inistoryahan.
Nanghinaot mi nga ma-apresyar ninyo ning among paningkamot nga mahatag sa inyoha ang atong mga panginahanglan sa Binisaya ng pinulungan. Kon naa moy mga suhestyon para mabasa pud sa uban, andam ming motimbang-timbang niana para atong mai-syer pud sa uba. DAGHANG SALAMAT MGA KA-BISDAK.
No comments:
Post a Comment